Viska og gleði

Fyrri lífa heilun

Ég lærði heilun fyrri lífa hjá Nicholas Demetry. Nicholas er geðlæknir sem hefur blandað saman hefðbundinni læknisfræði og orkuvinnu. Hann starfar í Atlanta í Bandaríkjunum en hefur kennt þessa heilunaraðferð á námskeiðum út um allan heim. Einn af þeim sem kenndi honum var maður sem hét Stylianos Atteshlis (Daskalos) en hann bjó og starfaði á Kýpur.

Nicholas Demetry er með skóla í Atlanta sem heitir Etherikos International School of Energy Healing and Spiritual Studies. Hann kom hingað til lands um nokkurra ára skeið til þess að kenna, ég útskrifaðist úr skólanum hjá honum í mars 2001.

Námið var eins og sniðið fyrir mig því ég hef alltaf haft gífurlegan áhuga á fyrri lífum. Mér fannst mjög spennandi að geta upplifað og unnið út áföll fyrri lífa í gegnum djúpslökun.

Upplifunin er yfirleitt mjög sterk manneskjan sér sjálfa sig eins og hún var í fyrra lífi, fötin, skóna, umhverfið, hárið, hvort hún/hann var karl eða kona, aðra manneskjur (sem hún/hann þekkir oft í þessu lífi) og umhverfið verður einnig augljós s.s. landslag, hús og farartæki. Margt verður eins augljóst og það sé að gerast í nútímanum.

Unnið er að heila það sem kemur upp s.s. tengingar við aðrar manneskjur, ástæður fyrir því að atburðurinn gerðist og hvað megi læra af því og hvernig það tengist nútímanum o.s.frv.

Það sem maður fær út úr því að skoða fyrri líf er fyrst og fremst að losa út gamlar tilfinningar sem eru að skjóta upp kollinum í núverandi lífi.

Þegar ég fer sjálf í fyrri lífa heilun þá sé ég að ég er að endurtaka sömu hlutina með sama fólkinu aftur og aftur. Með því að losa orkuna út þá verð ég fær um að sjá hlutina í nýju ljósi og ég fæ skilning á því af hverju mér leið eins og mér leið í kringum manneskjuna eða atburðinn.

Sumir hafa sterkari minningar úr fyrri lífum heldur en aðrir, það getur birst í ýmsum myndum eins og því að hafa sterka löngun til að heimsækja ákveðið land eða ákveðinn stað. Það getur líka birst í því að okkur finnst við þekkja einhvern sem við höfum kannski aldrei séð áður.

Ég hafði sterkar minningar úr síðast lífi þegar ég var barn en það var tengt flugvélum, ég var logandi hrædd við þær og fannst að þær gætu skaðað mig á einhvern hátt. Mig dreymdi marga drauma um hrapandi flugvélar en það var ekki af því að ég hafði séð það gerast í bíómyndum. Það var ekki komið sjónvarp heima hjá mér fyrr en ég var orðin 10 eða 11 ára.

Seinna á ævinni hafði ég það sterkt á tilfinningunni að ég hafi dáið í seinni heimstyrjöldinni í Amsterdam, vegna sprengju sem hafi verið varpað úr flugvél. Ég fór í fyrri lífa heilun og sá þá (með innri sjón) hvernig eldtungurnar komu á móti mér og hvernig lífi mín lauk á því augnabliki.

Ég fór til Amsterdam árið 2000 og gisti eina nótt á hóteli í miðbænum ásamt fjölskyldunni. Á meðan allir sváfu vært gat ég ekki sofið eina mínútu vegna þess að mér fannst að eitthvað væri að koma inn um gluggann. Það var alveg sama hversu mikið ég sannfærði sjálfa mig um að þetta væri ekki raunhæfur möguleiki þar sem við vorum á annarri hæð. Ég varð fegnust þeirri stundu þegar hinir vöknuðu morguninn eftir og við keyrðum aftur til Þýskalands.

Við komum með allar neikvæðu og erfiðu tilfinningarnar úr fyrri endurfæðingum og erum stöðugt minnt á þær af lægra sjálfinu. Það kemur fram í ótta, reiði, sjálfsásökun, dómhörku, valdabaráttu og fleiru. Allt sem við höfum ekki tekist á við læðist upp á yfirborðið þegar við eigum síst von á því. Þeir sem eru okkur samferða í lífinu spegla það sem við þurfum að skoða og aðstæður eru skapaðar til þess að við sjáum það sem við þurfum að sjá til þess að við getum losað það út að fullu.

Tilgangurinn með því að vinna út fyrri lífa minningar eða orku er sá að losna við neikvæðar tilfinningar. Neikvæðar tilfinningar hindra okkur í því að elska okkur sjálf og aðra á þann hátt sem sálin elskar. Því meira sem við náum að losa af tilfinningum utan af sálarkjarnanum því meira skín sálin okkar í gegn.

Ég býð upp á heilun, eða djúpslökun þar sem markmiðið er að losa út gömul áföll, einkatímar eða vinnsla í gegnum Skypið

Efst á síðu

Ýmislegt

Heim