Viska og gleði

Englarnir

Englar eru hjálparverur sem eru með okkur öllum alveg frá því að við fæðumst og þar til við yfirgefum jarðlífið. Þeir eru til að vernda okkur og hjálpa á lífsgöngunni.

Það eru til alls konar englar, allt frá litlum englum til stórra engla eins og erkienglanna, þeir eru mjög stórir með mikið vænghaf. Já englarnir eru vissulega með vængi, eða þannig sé ég þá að minnsta kosti og mér sýnist að flestir sjái þá þannig. Eflaust birta þeir sig þannig til þess að við sem erum í þessari vídd getum aðgreint þá frá öðrum hjálparverum.

Mikael

Suma engla þekkjum við með nafni, en þar eru erkienglarnir þekktastir. Sá sem flestir þekkja með nafni er Mikael erkiengill hann er oftast sýndur með rauðan eða bláan orkulit í kringum sig. Flestir sjá hann fyrir sér sem engil kraftsins, viljans, hugrekkis og verndar.

Mikael hefur element eldsins og umbreytingarinnar, hann sýnir sig oft með sverðið sem er tákn styrksins. Það er hægt að biðja Mikael að klippa á tilfinninga tengingar sem eru að valda okkur sársauka, þessar tengingar er hægt að klippa hvort sem manneskjan er nátengd eða ekki. Þegar þessar tengingar hafa verið klipptar verður eftir tengin hinnar óskilyrtu ástar á milli sálnanna. Best að fara með fyrirgefningar bænina um leið og við sleppum þessum tengingum. Það eitt að nefna nafn Mikaels nægir til þess að hann kemur til okkar og við erum umvafin orku hans. Þegar hann er komin bíður hann eftir að við biðjum hann um að gera eitthvað fyrir okkur.

Það er hægt að biðja hann um svo margt, t.d. að hjálpa okkur að heila það sem er að í líkamanum eða það sem við þurfum að losa úr orkulíkömunum. Það er t.d. hægt að biðja hann um vernd og að hafa yfirumsjón með verndinni fyrir okkur. Mikael getur hjálpað okkur með hugrekki til að takast á við erfiðleika sama hversu óyfirstíganlegir þeir virðast vera. Það er hægt að biðja Michael um hugrekki til að takast á við framtíðina. Hann getur gefið okkur hugrekki til að segja sannleikann ef við erum hrædd við að segja það sem við þurfum að segja.

Mikael er ávallt reiðubúin til hjálpar og hann getur verið á mörgum stöðum í einu. Allt og sumt sem við þurfum að gera ef við þörfnumst aðstoðar hans er að kalla nafn hans og hann er á staðnum. Þá er bara að segja hvað það er sem við viljum að hann aðstoði okkur með.

Uriel

Uriel erkiengill er líka þekktur undir nafni, orkan hans er silfurhvít. Uriel getur hjálpað okkur á ýmsan hátt hann getur m.a. hjálpað okkur að koma jafnvægi á og samþætta orkuna á milli orkulíkama (áru) og efnislíkama. Ef við eigum í einhverjum vandræðum með að breyta hugsunarhætti okkar eða erum stressuð eða pirruð þá getur hann hreinsað þá orku út, þá finnum við að friður og ró færist yfir.

Elementið hans er jörðin, hann getur því hjálpað okkur að jarðtengjast betur ef við erum illa jarðtengd, en jarðtengingin er mikilvæg því ef við erum illa jarðtengd eru við mjög utan við okkur og eigum erfitt með að muna hluti og getum orðið óeðlilega róleg.

Gabríel

Gabríel erkiengill er með element vatnsins, ef við eigum í erfiðleikum með tilfinningar, þá getum við beðið Gabríel að hjálpa við að hreinsa þær út með vatnsorkunni það er sama hvort þær tilfinningar eru komnar frá okkur sjálfum eða við höfum tekið þær upp frá öðrum.

Það er hægt að biðja Gabríel um að hreinsa orkuna í því húsnæði sem við erum í, en það á við um alla erkienglana. Gabríel getur gefið okkur leiðbeiningu um hver tilgangur okkar er í lífinu, ef við vitum ekki hvert við stefnum.

Ef það eru stórfelldar breytingar framundan eða við erum að fara að breyta um starf eða breyta lífsháttum þá er gott að biðja Gabríel um leiðsögn hann er ávallt tilbúin að leiðbeina okkur og styðja.

Rafael

Rafael er með element loftsins. Ég sé hann með fjólubláa orku umhverfis sig, en hann er líka talinn hafa græna eða bleika orku. Það misjafnt hvernig englarnir sýna sig hjá hverjum og einum, litir, útlit og hvað hver og einn biður þá að hjálpa sér með, það á líka við um meistarana það er bara hvernig við sjáum þá hvert og eitt.

Rafael getur hjálpað okkur með hugsanir okkar ef við erum að fást við hugsanir og hugsanamunstur sem við höfum safnað upp í hugarlíkamanum. Hann getur hjálpað okkur að hreinsa hugarlíkamann sem er tengdur sólarplexus, hann getur líka hjálpað okkur við að hægja á hugsunum í höfðinu og kyrra hugann. Þá er hægt að biðja hann að hjálpa við að umbreyta neiknvæðum hugsunum í jákvæðar.

Sumir telja að Rafeal sé engill vísinda og þekkingar og að hann sé með þeim sem vinna við að finna upp og smíða tæknilega hluti. Við getum beðið hann að hjálpa okkur ef við erum í vandræðum með tölvuna, bílinn eða annað sem tengist tækni.

Shamúel

Shamúel erkiengill getur hjálpað með ástina og kærleikann það er að elska án þess að ætlast til þess að við fáum eitthvað í staðinn. Það er t.d. eins og við elskum börnin og dýrin.

Shamúel er sá erkiengill sem hvetur okkur til að elska okkur sjálf, það er kannski eitt það erfiðasta sem við gerum, þ.e.a.s. elska okkur sjálf. Við getum elskað aðra og umborið þá en ef við eigum að fara að elska og virða okkur sjálf þá er það oft mjög erfitt. Það er sem sagt gott að biðja Shamúel að hjálpa okkur að virða og elska okkur sjálf, hlú að okkur sjálfum eins og við myndum gera við aðra manneskju sem okkur þykir vænt um. Það er jafn mikilvægt að sýna okkur sjálfum væntumþykju, því ef við lærum að elska okkur sjálf þá eigum við betra með að elska og virða aðra.

Jófíel

Jófíel erkiengill er sá engill sem getur hjálpað okkur að taka eftir nýjum hugmyndum. Við fáum kannski hugmynd að því að skapa eitthvað s.s. að mála mynd, skrifa, sauma, föndra, búa til úr leir eða hvað það er við erum að skapa. Við getum beðið Jófíel að hjálpa okkur að fara inn í flæðið, en með því að vera inn í sköpunarflæðinu getum við náð betri árangri við verkið.

Jófíel færir okkur líka gleði og hlátur þannig að ef við viljum fá inn gleði þar sem við erum ein eða komum saman með öðrum þá er bara að kalla í Jófíel og biðja hann að gefa okkur smá hláturduft sem hægt er að sturtar yfir okkur. Þannig er hægt að létta andrúmsloftið ef það er þörf á því, það er ótrúlegt hvað þetta getur virkað vel. Í skammdegis þunglyndi er gott að kalla á Jófíel og biðja hann að hreinsa út neikvæð hugsanamynstur.

Kassíel

Kassíel færir inn jafnvægi í sveiflukenndu tilfinninga ástandi, þ.e.a.s. þegar við sveiflumst frá gleði yfir í þunglyndi, frá spenningi yfir í kvíða, frá gráti yfir í hlátur. Þetta fer oft saman og við verðum að upplifa hvor tveggja til að kynnast báðum hliðum. Við getum verið í mikilli gleði einn daginn en farið í dýpstu sorg þann næsta, eða þá að við getum verið í mikilli tilfinninga hreinsun og grátið og grátið, en síðan getur brotist út mikil gleði og hlátur þar sem tilfinningar hafa losnað út.

Zadkiel

Zadkiel er hérna til að hjálpa okkur að fyrirgefa, bæði sjálfum okkur og öðrum. Ef við höldum í hatrið og reiðina er það verst fyrir okkur sjálf, við sitjum uppi með þessar tilfinningar og þær eru eyðileggjandi fyrir okkur það er því best að láta þær fara.

Við getum beðið Zadkiel um að hjálpa okkur við að finna út af hverju við erum reið og út í hvern, fyrir hvað. Við getum beðið hann að sýna okkur hvaðan reiðin kemur og hvað það er í okkur sem veldur reiðinni. Biðja hann að hjálpa okkur að kafa virkilega djúpt og athuga hvort við getum fundið raunverulega ástæðu fyrir því að við erum svona reið, finna fyrir tilfinningunni og jafnvel nefna hana, sjá svo fyrir okkur að við göngum að manneskjunni sem reiðin beinist að og segjum henni að við fyrirgefum henni það sem hún gerði okkur og biðjum jafnframt um að hún fyrirgefi okkur.

Metatron

Metatron af sumum talin vera konungur englanna. Hann getur hjálpað okkur að tengjast æðra sjálfinu og Guði.

Sumir segja að Metatron hafa yfirumsjón með akasa skránum. Akasa skrárnar geyma allar upplýsingar um okkur frá því að sálin varð til og fram að þeim tímapunkti sem við erum á núna. Hvert og eitt okkar á sína lífsskrá, allt sem við höfum upplifað og allt sem við höfum gert í öllum okkar lífum og millilífum er skráð í akasa skrárnar.

Metatron getur t.d. hjálpað okkur með jafnvægið í kven -og karlorkunni. Allir hafa í sér kven- og karlorku, bæði karlar og konur. Kvenorkan er sögð vera í vinstri hlið líkamans og karlorkan í þeirri hægri. Hver orkustöð hefur líka í sér bæði kven-og karlorku. Það er misjafnt hvort er meira ráðandi hjá fólki karl -eða kvenorkan. Það er mikið um að konur hér á landi haldi sér gangandi á karlorkunni, þar sem þær eru mjög sjálfstæðar. Það gerir þær sterkar en í staðinn missa þær mýktina sem einkennir kvenorkuna. Það er best að þessir þættir séu í sem bestu jafnvægi svo að okkur líði vel.

Melkísedek

Melkísedek er af sumum talin vera faðir englanna. Ljósið hans er hvítt eða silfurlitað. Það kemur mikill heilunarkraftur með Melkísedek eins og öllum erkienglunum. Melkísedek hefur sterk áhrif á umhverfið þegar hann mætir á svæðið, enda orkan hans mjög þétt. Hann getur t.d. hjálpar okkur með opnun á orkustöðvarnar ef það er einhver orkustöð sem við eigum í erfiðleikum með þá stundina.

Þegar við höfum allar orkustöðvarnar opnar og það er opið á milli þeirra þá eigum við auðveldara með að halda áfram á andlegu brautinni. Í rauninni þurfum við að hreinsa út úr öllum orkustöðvunum því hindranirnar eru alls staðar þær verða til á misjöfnum aldursskeiðum í misjöfnum orkustöðvum. Það er í raun lífsverkefni okkar að hreinsa orkustöðvarnar enda kemur alltaf eitthvað nýtt og nýtt upp þegar eitt hefur verið hreinsað út. Orkan kemur í lögum sem eru eins og á lauk, þegar einu lagi hefur verið flett þá birtist það næsta. Því meira sem við náum að fletta utan af lauknum því nær náum við að vinna okkur að kjarnanum, sálinni og þeirri visku sem hún býr yfir.

Tenging við englana

Það er auðvitað endalaust hægt að biðja englana, erkienglana og aðrar hjálparverur um að hjálpa sér í lífinu, það sem ég set hérna fram er bara lítið brot af því sem hægt er að gera með englunum og ég skrifa ekki um alla þá erkiengla sem eru þekktir. Þó að ég setji ákeðin atriði inn hjá hverjum og einum þá er það ekkert bundið við þann engil, það má biðja hvaða engil sem er um hvað sem er, við þurfum bara að láta hugmyndaflugið ráða.

Það er hægt að kalla á englana hvort sem við erum úti í náttúrunni, í búðinni, vinnunni, skólanum, keyrandi, eða heima við eldhúsborðið. Það er bara hvar okkur þykir þægilegast að vera og hvað viljum við biðja englana um að hjálpa okkur með, þeir eru alltaf tilbúnir til að veita alla þá aðstoð sem við óskum eftir hvort sem það er að nóttu eða degi.

Vernd englanna

Ég hef oft farið í píramídahugleiðsluna, hún er mjög góð þegar maður vill vinna að sinni eigin heilun. Þessi vinna gefur góða slökun og mikla heilunorku hvort sem við viljum vinna með ákveðið verkefni eða erum bara að leita eftir heilunarorku. Ef við þurfum vernd gegn einhverju í umhverfinu þá er hægt að biðja englana í píramídanum að vera með sér áfram t.d. í vinnunni eða skólanum ef því er að skipta. Þá hugsar maður sér englana í kring um sig á sömu stöðum og þeir eru í píramídanum þ.e.a.s. Mikael hægra megin, Rafael vinstra megin, Gabríel fyrir aftan og Uriel fyrir framan.

Englahjálp í umferðinni

Ég kalla oft á englana til að hjálpa mér, ég bið þá t.d. um hjálp í umferðinni. Ég bið verndarengil að vera fyrir framan og aftan bílinn minn og allt í kring um ég bið hann að passa að hægja á bílum fyrir aftan mig ef þeir koma of nálægt og passa að ég hægi tímanlega á mér fyrir aðra. Með þessu er ég að biðja þá um að aðstoða mig, auðvitað þarf ég líka að passa það hvernig ég keyri, ég get ekki keyrt eins og mér sýnist og treyst svo á að englarnir passi mig. Ég bið þá að minna mig á ef ég keyri of hratt, ég get alveg sagt ykkur það að það er oft bankað í öxlina á mér ef hraðamælirinn er farinn að sýna óþarflega háar tölur. Ég bið lika um þessa vernd þegar ég er með öðrum í bíl, það er að segja bið engilinn að vera fyrir fram og aftan bílinn. Ég legg verndina sem sagt í hendurnar á englunum og reyni svo að keyra skikkanlega, það er mitt framlag til öryggis míns og annarra í umferðinni. Auðvitað geta alltaf orðið óhöpp og slys en ég get þá allavega sagt að ég gerði það sem ég gat til að vernda mig og aðra.