Draumar

Draumar

Eitt af því sem mér finnst mjög merkilegt við okkur mannfólkið er að við skulum hafa þann hæfileika að dreyma á meðan við sofum. Meira að segja algjörir efasemdar menn/konur geta ekki neitað því að þá dreymi drauma og það sé eitthvað sem ekki verði stutt með rökum.

Draumar hjálpa okkur að skyggnast inn í framtíð og vinna úr fortíð

Draumar hafa m.a. þann tilgang að við getum skyggnst inn í framtíðina, en aðeins eins og undirmeðvitundin leyfir okkur. Í gegnum drauma vinnum við líka með vandamál fortíðar og nútíðar.

Það er svo margt sem við getum lært með því að skoða draumana okkar. Þegar við byrjum að skrifa niður drauma og spá meira í hvað þeir þýða þá fer okkur að dreyma öðruvísi og það er eins og við öðlumst meiri færni við að lesa úr eigin draumum. Alla dreymir eitthvað einhver tíman, en fólk dreymir samt misjafnlega mikið og sumir myndu segja misgáfulega drauma. Hinar verstu martraðir eru oft ekki fyrir neinu slæmu heldur er þær oft komnar til vegna þess að við erum að vinna úr gömlum lífum. Margir spyrja sjálfa sig hvaðan þeir geti hafa fengið þessar hugmyndir í kollinn og skilja ekkert hvað þetta kemur. Það er verið að losa gömul líf út vegna einhvers sem er að gerast í lífi viðkomandi. Við vinnum úr allskonar málum í draumum, sættumst við fólk, rífumst við fólk, ferðumst, flytjum á milli landa eða landshluta, eignumst peninga, fáum aðra vinnu, eignumst börn þó við séum löngu komin úr barneign og þannig mætti lengi telja.

Það er líka margt annað sem gerist þegar við erum sofandi, þegar líkaminn hvílist þá er lægra sjálfið ekki lengur á verðinum og við getum gert það sem okkur dettur í hug, eða virkilega langar til að gera í dagvitundinni. Við ferðumst óháð tíma og rúmi í svefni.

Draumaráðningar

Mig hefur alla tíð dreymt mjög mikið og oft eru það skýrir fyrirboðar sem ég fæ en ég þarf að læra að skilja hvað þessir fyrirboðar tákna. Mér finnst persónulega ekki hægt að taka mark á draumaráðningabókum nema að mjög takmörkuðu leiti því að það virðist vera að hvert og eitt okkar dreymi þannig að við verðum að túlka okkar drauma sjálf að minnsta kosti verður að taka með í reikninginn hvað hver hlutur táknar hjá hverjum og einum við túlkun drauma. Ég hef reyndar heyrt af því að ef fólk er með vissa draumaráðningabók við hendina og les hana mjög oft þá geti það farið að dreyma þau tákn sem skrifað er um í bókinni. Margir læra af foreldrum eða öfum og ömmu hvað draumar þýða og virðist það geta gengið á milli ættliða að sama draumatáknið komi upp og þýði það sama.

Draumar og tákn

Það sem mig dreymir og ég túlka á ákveðinn hátt þarf ekki endilega að þýða það sama fyrir einhvern annan. Mig dreymir til dæmis að ég sé að veiða laxa þegar það fer að kólna í veðri, þá fer fjöldi laxanna eða fiskana eftir því hversu margir kuldadagarnir verða. Ef mig dreymir hlaupandi hesta þá er það fyrir roki, ef þeir eru rauðir þá verður rigning með rokinu. Þegar mig dreymir peninga í veskinu mínu þá fæ ég peninga í alvörunni. Þegar mig dreymir að ég sé að taka upp kartöflur og uppskeran er góð þá veit það á eitthvað happ eða eitthvað sem kemur sér mjög vel fyrir mig. Ef ég fer og næ mér í svartan alklæðnað í fataskápinn þá veit það á dauðsfall hjá mjög nánum ættingja. Ef það eru svört föt annað hvort buxur eða jakki þá er ættinginn eða vinurinn ekki eins nákominn. Ef ég er að moka skít þá verður mikið að gera hjá mér en það tengist einhverju sem ég þarf að vinna fyrir aðra.

Að synda í vatni eða sundlaug er fyrir veikindum hjá mér

Mig hefur dreymt fyrir kyninu á öllum barnabörnunum mínum en það er oftast ekki fyrr en alveg í lok meðgöngunnar sem ég hef fengið að vita hvort kynið er á leiðinni. Mig dreymir þá annað hvort bláan, grænan eða bleikan lit á barnafötum eða skóm. Þegar ég hef verið að synda í vatni eða sundlaug, þá er það fyrir veikindum, það þarf ekki að vera stórvægileg. Syndi ég í á, þá er það frekar fyrir einhverju mótstreymi. Stundum dreymir mig að ég syndi í sjó en það finnst mér alltaf vera góðs viti enda vön sjósundi þó að ég stundi það ekki nema við einstök veðurskilyrði.

Það er marg sannað að þeir sem skrifa niður draumana sína fara að eiga betra með að muna þá eftir að þeir byrja á því. Það er líkast því að um leið og undirmeðvitundin verður meðvituð um að við viljum muna draumana þá fari eitthvað að gerast sem valdi því að við munum þá. Við vinnum stundum úr fyrri lífa minningum í draumum en það eru þeir draumar sem við erum með fólki sem við þekkjum ekki neitt í nútíðinni og við erum jafnvel sjálf aðrar persónur í draumunum og yfirleitt gerist draumurinn þá í öðru landi og við erum á öðru aldurskeiði en við eru á í dag. Stundum dreymir okkur þessa drauma og það er eins og við séum að horfa á bíómynd eða séum þátttakendur í bíómynd. Margir hrista bara hausinn yfir þessum draumum og finnst þeir vera tómt rugl, en draumar eru aldrei rugl það erum bara við sem kunnum ekki að túlka þá.

Horfði á sjálfa mig sem lítið barn í öðru lífi

Fyrir nokkrum árum dreymdi mig þannig draum þar sem ég sá sjálfa mig sem lítið barn, ég var um það bil eins og hálfs árs gömul og móðir mín í því lífi er dóttir mín í dag. Ég sá samskipta mynstrið hjá okkur, en það merkilegast við þennan draum var að ég man að ég horfði í augun á barninu og sá þar sjálfa mig. Það var svo sterk upplifun að horfa á sjálfa mig þarna í líkama lítils barns í öðru lífi. Þó að það séu mörg ár síðan mig dreymdi þennan draum þá man ég augnaráð barnsins enn þann dag í dag.

Samskipti við huldufólk í draumaheimi

Mig hefur líka dreymt mjög undarlega drauma þar sem ég er að hafa samskipti við huldufólk en það var annað eða þriðja árið eftir að við hjónin gerðumst bændur og við vorum að safna kúm í fjósið þar sem við höfðum ákveðið að skipta úr sauðfjárbúskap yfir í kúabúskap. Við vorum búin að eignast 3 eða 4 kýr og eitthvað af kálfum þegar það gerist eina nóttina að besta kýrin fer í pytt og drepst þar. Stuttu seinna misstum við unga kvígu ofan í sama pyttinn, en eftir það var girt í kringum hann svo ekki yrði meiri skaði. Mér fannst þetta vera ósanngjarnt og fannst mikið hafa verið af okkur tekið þar sem það var ekki svo auðvelt að koma upp kúastofni, því kýr lágu ekki á lausu á þessum tíma.

Álfkonan

Stuttu seinna dreymir mig mjög undarlegan draum, það kemur til mín álfkona og hún fer með mig upp á holt þar sem útsýnið er gott, þetta holt tilheyrir jörðinni þar sem ég bjó. Hún biður mig að fyrirgefa sér þetta með kúna og kálfinn en hún hafi þurft á þessu að halda. Hún segist skuli bæta mér þetta upp og til þess að staðfesta það sýnir hún mér rauðan kálf eða kálfa mig minnir að kálfarnir hafi verið tveir. Ég man ekki til þess að það hafi farið meira á milli mín og álfkonunnar í þessum draumi.

Það næsta sem gerist er að við sjáum kýr og kvígur auglýstar í blaði, þar sem einn bóndi í nágranna sveitinni var að hætta í kúabúskap og skipta í refarækt. Hann var búin að vera með ræktun í marga áratugi og hafði því komið sér upp úrvals kúastofni. Við keyptu reyndar af honum kvígur sem voru komnar að burði og síðan fullt af kálfum sem urðu uppistaðan í kúastofninum og flestar voru þessar kýr rauðar.

Ekki veit ég samt hvað blessuð álfkonan ætlaði sér með þessa nautgripi sem fóru í pyttinn. Ég veit heldur ekki af hverju mig dreymdi álfkonuna, því ég var alls ekki að hugsa um álfa eða huldufólk á þessum tíma fannst það í raun bara vera skemmtileg þjóðsaga þetta með huldufólkið.

Það sem þessi samskipti við huldukonuna í draumnum kenndu mér aftur á móti var að bera virðingu fyrir umhverfinu mínu. Ég fór að hugsa um að það gæti verið annað og meira í umhverfinu en það sem ég sæi með hefðbundinni sjón og ég ætti auðvitað að sýna þeim nágrönnum mínum sömu virðingu og öðrum. Þetta voru ekki einu samskiptin mín við huldufólk á þessu tímabili en þau fóru fram á annan hátt en í draumi.

Heilunarferðir í svefni

Ég hef verið send til fólks í svefni þar sem ég hef verið notuð sem orku millistykki við heilun. Ég hef m.a. tvisvar sinnum farið til manna sem ég veit að voru nýbúnir að fara í hjartaaðgerð, ég fann að ég setti hendurnar á þá við hjartastað og ég fann hvernig ofboðlegt orkustreymi flæddi út úr höndunum á mér. Það gerðist með einhverra ára millibili og ég var ekkert að hugsa um að senda heilun á þessa menn, eða yfirleitt að hugsa um þá og þeirra veikindi í vökunni.

Einu sinni fann ég að ég lá við hliðina á fárveikri konu, ég bara fann að ég lagðist við hliðina á henni og ég snéri bakinu upp að henni, ég fann þá hvernig krafturinn streymdi frá líkamanum mínum til hennar. Í draumnum fannst mér ég verða rennandi sveitt á bakinu, en það var vegna þess að þessi kona var mikið veik. Ég veit ekkert hvaða kona þetta var, en þegar ég vaknaði þá var ég rennandi sveitt á bakinu. Mér fannst þetta mjög einkennilegt en ég hef örugglega verið búin að gefa leyfir fyrir þessari næturvinnu því annars hefði þetta ekki geta orðið. Maður sér á þessu hvað margt er hægt að gera þegar takmarkandi hugur er ekki lengur á verðinum og maður sefur á sínu græna.

Skýr skilaboð að handan í gegnum drauma

Eftir að bróðir minn dó 1974 þá dreymdi mig marga drauma þar sem hann kom við sögu. Mig dreymdi að ég hitti hann aftur og aftur og ég var alltaf að upplifa að hann væri á lífi þrátt fyrir að vera farin. Ég var svo glöð að hitta hann í draumunum og að hann væri á lífi og dauði hans hefði í raun verið óþægilegur draumur. Þegar ég vaknaði aftur á móti frá þessum draumum helltust vonbrigðin yfir mig. Mig dreymdi þessa drauma þangað til ég hafði náð þeim skilaboðum að hann væri raunverulega farin í aðra heima/víddir en væri samt ennþá lifandi. Mig dreymir hann samt af og til ennþá en það gerist æ sjaldnar nú orðið.

Þegar bróðursonur minn sem núna er komin yfir tvítugt var enn í móðurkviði fer mig að dreyma þennan bróðir minn. Mig dreymir að hann kemur til mín að minnsta kosti þrisvar eða fjórum sinnum, ég var nú eiginlega farin að hafa áhyggjur af því að ég væri ófrísk og hann vildi láta barnið heita eftir sér. Ég tók eftir því í síðasta skipti sem mig dreymir hann að hann er að hjálpa mér við að gera við bílinn minn, ég sá varahlut sem var verið að skipta um í bílnum. Mig minnir að þetta hafi verið dempararnir að aftan. Hann segir við mig að þegar það sé búið að gera við bílinn þá komi ég og hitti hann. Ég var lengi að velta því fyrir mér hvað þessi draumur þýddi og hvernig ég ætti að túlka hann. Ég hafði samt engar áhyggjur að ég væri að fara að yfirgefa jarðvistina þrátt fyrir þetta.

Þegar ég hafði hugsað töluvert um hvað draumurinn þýddi, uppgötvaði ég að ég ætti að segja bróður mínum og mágkonu að þau ættu að skíra barnið í höfuðið á þessum bróðir okkar. Á þessum árum fannst mér hálf asnalegt að fara að segja frá þessu, þar sem mér fannst að fólk ætti að fá að ráða því sjálft hvað það léti börnin sín heita, en ég lét nú samt tilleiðast og hringdi í mágkonu mína og sagði henni frá draumunum og hvernig ég túlkaði þá. Þá sagði hún að hana væri líka búið að dreyma bróður minn og hún skildi þetta á sama veg og ég, að hann vildi láta heita í höfuðið á sér, auk þess hafði þessi látni bróðir minn rétt henni blómvönd úr smárablómum, en hún túlkaði að Smári ætti þá að vera seinna nafnið.

Ég veit ekki ennþá af hverju hann birtist mér í draumi líka til að láta vita af ósk sinni með nafnið, af hverju hann lét ekki nægja að koma í draumi til mágkonu minnar. En rétt áður en kom að skírninni voru keyptir dempara undir bílinn og það var nýbúið að setja setja þá undir þegar við fengum boð um að mæta í skírnarveislu. Skírnarveislan var haldin á heimili nýfædda barnsins þannig að við þurftum að keyra langan veg (um 150 km) svo það var betra að hafa bílinn í góðu lagi.

Efst á síðu

Ýmislegt

Heim

© Jónína Þorbjörg Gunnarsdóttir netpóstur