Viska og gleði

Í Skarðsvík á Snæfellsnesi

Hvað er að baki því veraldlega

Ég hef frá því ég man eftir mér velt fyrir mér tilgangi mínum á jörðinni. Hver er ég? Hvaðan kom ég? Hvert fer ég? Fæðumst við hér á til að vera hér eina mannsævi stutta eða langa, með mjög svo miserfið verkefni í farteskinu, eða fæðumst við aftur og aftur og þroskum þannig sálina með stöðugri þekkingu í gegnum margar endurfæðingar?

Það má sennilega segja að ég hafi alltaf verið í andlegum hugleiðingum þó að ég hafi ekki talað mikið um það við aðra til að byrja með. Ég spáði í lífið og tilveruna út frá mínum forsendum þangað til ég komst í tæri við bækur sem fjölluðu um þetta efni. Það var ekki fyrr en ég var rúmlega þrítug sem ég fór að sækja námskeið sem tengdust andlegum málum.

Leitin hefst

Fyrsta andlega námskeiðið sem ég fór á var hjá Sigurði Geir Ólafssyni miðli en hann var með námskeið sem miðaði að því að opna fyrir sjötta skilningarvitið og efla næmni. Á námskeiðinu hjá honum kynntist ég heilun í fyrsta skipti en fram að því hafði ég haldið að heilun væri aðeins fyrir fáeina útvalda. Sigurður Geir var sá fyrsti sem ég hitti sem talaði um fyrri jarðvistir sem eðlilegasta hlut í heimi. Þessi yndislegi kennari í andlegum málum yfirgaf jarðlífið fyrir fáeinum árum.

Brian Weiss

Næsti kennari sem kenndi mér þessi fræði var geðlæknirinn Brian Weiss en með bókunum sínum, "Mörg líf, margir meistarar, og "Sama sál margir líkamar" sýnir hann fram á hvernig meðferðir sem hann stundaði þróaðist út í það að fara að vinna með fólk út frá fyrri lífum. Í bókinni "Sama sál margir líkamar" sýnir hann fram á hvaða áhrif vinna með fyrri lífa tilfinningar, eða tilfinningar núverandi lífs hefur fyrir fólk í framtíðarlífum þess. Þessi bók hefur að því ég best veit ekki verið þýdd á íslensku en hún heitir Same Soul, Many Bodies" á ensku, aftur á móti hefur bókin "Mörg líf margir meistarar" verið þýdd á íslensku og er til hér m.a. í versluninni Betra líf í Kringlunni.

Nicholas Demetry

Þá er komið að Nicholas Demetry geðlækni sem kenndi mér að vinna með sjálfa mig og aðra, í tilfinningavinnu sem tengdist annað hvort núverandi lífi eða fyrri lífum. Þessi aðferð sem hann kenndi felst m.a. í því að leiða fólk inn í djúpslökun og ná í gamlar minningar/áföll sem liggja djúpt í undirvitundinni. Demetry býr í Atlanta í Bandaríkjunum en hefur kennt þessi fræði víðs vegar um heiminn og þar á meðal á Íslandi. Ég útskrifaðist úr skólanum hans "Etherikos International School of Energy Healing and Spiritual Studies" vorið 2001.

Maitreya - Margaret McElroy

Næsti kennari sem ég lærði hjá er Margaret McElroy. Ég er búin að fara á fjögur námskeið hjá Margareti/Maitreya. Ég hitti hana fyrst í Seattle árið 2006 og tók stutt heilunarnámskeið. Síðan þá er ég búin að fara á einkanámskeið 2007, Channeling námskeið 2009 og nú síðast fór ég á námskeið í nóvember 2010 sem heitir "Five days beyond Brotherhood course." Margaret miðlar þekkingu frá andlegum kennara sem kallar sig heimskennarann. Í okkar heimi er hann kallaður Maitreya, í kennslunni hans er talað um það hversu mikilvægt er að vinna út gömul áföll og horfast í augu við óttann sem liggur í djúpum undirvitundarinnar.

Ég hef þýtt bréfin hans Maitreya úr ensku yfir á íslensku og eru þau aðgengileg bæði á vefsíðunni minni og á vefsíðunni www.maitreya-edu.org Margaret McElroy var Madame Blavatsky í einu af sínum fyrri lífum og er komin aftur í jarðlífið sem miðill til þess að bæta fyrir þá kennslu sem hún setti þá fram, þar sem hún gerði andlegu kennslubækurnar svo flóknar að það þurfti aðra bók til þess að útskýra efnið í fyrri bókinni.

Karina Becker

Næsti kennari sem ég hitti og kennir m.a. um að vinna með tilfinningar núverandi lífs eða fyrri lífa heitir Karina Becker, hún lærði í "Barbara Brennan School." Barbara Brennan hefur meða annars skrifað bækurnar "Hendur ljóssins" og "Light Emerging." Karina Becker kom hingað til lands í mörg ár til þess að kenna í Kærleikssetrinu, ég útskrifaðist hjá henni úr heilunarskólanum vorið 2008.

Jean Luo

Önnur kona sem hefur verið mér góður kennari og ráðgjafi er Jean Luo. Jean Luo er fædd og uppalin í Kína, en hún flutti til Bandaríkjanna þar sem hún er búsett núna. Hún hefur unnið mikið með sjálfa sig og þar á meðal tilfinningar sem hafa verið uppi á yfirborðinu í núverandi lífi sem tengjast æskunni eða fyrri lífum. Hún skrifar um þessa reynslu og meðferðavinnu á vefsíðunni sinni maitreyaasia.com. Hún hefur nokkrum sinnum hjálpað mér með fyrri lífa vinnu í gegnum Skypið.

Karen Downing

Karen Downing hefur líka verið mér innan handar á minni andlegu leið, hún hefur hjálpað mér að finna út hvað er á bakvið ákveðna líðan, staðfesta það sem hefur komið upp á yfirborðið og gefa ítarlegri skýringar á því sem ég hef upplifað og skynjað. Karen miðlar andlegum meistara sem kallar sig Aurora eða sister. Með því að skoða akasa skrárnar/lífsferilskrá sálarinnar, hefur hún getað sagt mér hvað er efst á baugi orkulega. Karen hefur líka hjálpað fólki við að finna út hvar þarf að hreinsa til í íbúðum og húsnæði. Þrátt fyrir að hún búi í öðru landi þá hefur hún sagt nákvæmlega fyrir um hvar og hvað þarf að hreinsa og henda út til þess að fólki líði betur í eigin húsnæði.

Kristbjörg Elí Kristmundsdóttir

Ég útskrifaðist sem blómadropa þerapisti hjá Kristbjörgu Kristmundsdóttur vorið 2007, en Kristbjörg hefur helgaði sig að mestu leiti jógakennslu og blómadropa framleiðslu auk þess að kenna fólki að vinna út frystar tilfinningar.

Sigurður Guðleifsson

Um tíma hafði ég verið að leita fyrir mér að rétta kennaranum til þess að kenna mér svæðanudd, ég hafði nefnilega ákveðnar skoðanir fyrirfram hvernig svæðanudd ég vildi læra. Ég fann að lokum kennara sem kenndi þá aðferð við svæðanudd sem ég var að leita eftir, heppnin var með mér þá eins og endra nær, vegna þess að þessi rétti kennari Sigurður Guðleifsson bauð upp á námskeið á sama tíma og sjúkraliðaverkfallið stóð yfir haustið 2001.

Þá hef ég farið á fjöldann allan af öðrum námskeiðum sem of langt væri að telja upp, en þau hafa hvert á sinn hátt mótað mig og þroskað á leiðinni minni.

Efst á síðu

Ýmislegt

Heim